Një protestë e pazakontë dhe me ngarkesë të fortë simbolike është zhvilluar në fshatin Simon të Mirditës, ku dhjetëra banorë janë mbledhur për t’i thënë “jo” ndërtimit të hidrocentraleve në zonë.
Të vendosur në një rreth, me dorën mbi Ungjill, burrat e fshatit kanë shpallur publikisht se nuk do të pranojnë asnjë marrëveshje që, sipas tyre, rrezikon mjedisin, lumenjtë dhe jetesën e komunitetit. “Shpirti dhe nderi nuk shiten për para,” u shprehën ata në një video të publikuar nga JOQ, duke paralajmëruar se do të mbrojnë çdo pëllëmbë të tokës së tyre.
Banorët kanë theksuar se do të qëndrojnë të bashkuar deri në ndalimin përfundimtar të projekteve, ndërsa protesta e tyre ka tërhequr vëmendjen e opinionit publik.
Në zonën e Mirditës, konkretisht në Kaçinar, është planifikuar ndërtimi i katër hidrocentraleve nga kompania “Shpërdhaza-Energji”. Projekti ka shkaktuar kundërshtim të gjerë mes banorëve, të cilët pretendojnë se devijimi i rrjedhës së ujit dhe ndërtimi i digave do të dëmtonte ekosistemin, tokat bujqësore dhe furnizimin me ujë të pijshëm.
