Rreth 4 hektarë pyll me pisha janë djegur brenda pak orësh nga zjarri që ra pasditen e sotme në zonën e Gjinoqarit, në Bashkinë e Patosit.
Zjarri ka marrë përmasa të mëdha për shkak të erës së fortë dhe mungesës së pastrimit të terrenit, duke vështirësuar ndërhyrjen për shuarjen e tij.
Sipas kryeplakut të fshatit, Nuri Gllava, masivi pyjor nuk është pastruar për më shumë se 50 vite, duke ndihmuar përhapjen e shpejtë të flakëve dhe duke e bërë të vështirë qasjen me mjete zjarrfikëse.
Era e fuqishme po e shpërndan zjarrin në disa drejtime, duke shtuar rrezikun për zonat e banuara përreth dhe duke e përkeqësuar situatën nga ora në orë.
Pavarësisht thirrjes për ndihmë për ndërhyrje nga ajri, sot kjo gjë nuk ëshë realizuar, teksa është planifikuar që të ndërhyhet nesër me një helikopter.
