Hollywood-i është tronditur nga lajmi i ndarjes nga jeta të aktores së njohur Kelley Mack, në moshën 33-vjeçare. Aktorja, e njohur për rolin e saj si Addy në serialin post-apokaliptik “The Walking Dead”, humbi betejën me një sëmundje të rëndë – glioma, një tumor i sistemit nervor qendror.
Lajmi u konfirmua nga familjarët përmes një postimi në rrjetin social CaringBridge, dhe më pas në Instagram, ku shkruhej:
“Me trishtim të thellë njoftojmë ndarjen nga jeta të Kelley-t sonë të dashur. Një dritë e shndritshme dhe e zjarrtë ka kaluar në një tjetër botë, aty ku të gjithë ne duhet të shkojmë një ditë.”
Kelley Mack, e lindur Kelley Klebenow, u gjet e vdekur në qytetin e saj të lindjes, Cincinnati.
Homazhe dhe mesazhe ngushëllimi kanë ardhur nga kolegë të shumtë dhe fansa në mbarë botën. Aktorja Alanna Masterson, kolege në “The Walking Dead”, shkroi: “Çfarë njeriu i jashtëzakonshëm. Jam shumë krenare që kam luftuar krah saj në episodin tonë të fundit.”
Gjatë karrierës së saj, Mack interpretoi në mbi 35 role në film dhe seriale televizive, ndërsa ishte gjithashtu producente në pesë projekte. Përveç rolit të saj të spikatur në “The Walking Dead”, ajo u shfaq edhe në serialet “Chicago Med” dhe “9-1-1”. Mack ishte aktive edhe në industrinë e reklamave, duke punuar për kompani të njohura si Dr. Pepper, Ross Stores, Dairy Queen dhe Chick-fil-A.
Ajo nisi karrierën që në fëmijëri, duke u angazhuar në reklama televizive, ndërsa më pas ndoqi studimet për kinematografi në Chapman University në Kaliforni, ku zhvilloi edhe talentin e saj si regjisore dhe producente.
