Një qytetar i revoltuar ka denoncuar me foto gjendjen skandaloze të trotuareve të cilat janë zënë nga disa pika të “Big Market” në Tiranë dhe Vlorë, të cilat janë shndërruar në përgjysmuese trotuaresh e hapësirave publike të këmbësorëve në mes të qytetit.
Në vend që të jenë të aksesueshme për këmbësorët, hapësirat publike janë zënë nga paleta, frigoriferë, kuti e stendat e produktit, duke rrezikuar sigurinë e qytetarëve, sidomos të fëmijëve dhe nënave me karroca.
Ai ngre gjithashtu shqetësimin për trajtimin e pabarabartë të bizneseve nga institucionet shtetërore. Ndërsa dyqanet e vogla ndëshkohen për një tavolinë jashtë, oligarkët me lidhje politike nuk preken.
Në fotot e dërguara për JOQ, shihet qartë se si trotuaret janë të bllokuara totalisht nga mallra, ndërkohë që qytetarët detyrohen të kalojnë në rrugë.
“Ju dërgoj disa foto nga Vlora dhe Tirana, ku Big Market ka zënë komplet trotuaret. Në vend që të ecin njerëzit, ecin mbi paleta, frigoriferë dhe kartona. Po kalove me fëmijë ose me karrocë, del në rrugë, mes makinave!
Rama thotë se po i rregullon qytetet, por u bie në qafë dyqaneve të vogla që nxjerrin një tavolinë me produkte. Kurse këta oligarkët, si Vullnet Sinaj, që kanë bllokuar gjysmën e qytetit nuk i prek njeri!
Apo këto që nxjerr ky nuk janë rraqe…??? Ku është shteti për këta? Publikojeni që ta shohë e gjithë Vlora dhe Tirona.“ – shkruan denoncuesi/ JOQ
