Një zjarr masiv ka shpërthyer prej tre ditësh në Delvinë, teksa pasditen e kësaj të diele flakët përparuan pranë fshatit Kalasë, duke rrezikuar banesat, teksa banorët u evakuuan.
Ministria e Mbrojtjes u kujtua për të dërguar helikopter për shuarjen e zjarrit, vetëm kur flakët u shkuan në dyert banesave. Ndërkohë, në një reagim të fundit, për Ministrinë e Mbrojtjes “fajin” e ka era e fuqishme dhe jo autoritetet që prej 3 ditësh nuk e shuajnë dot zjarrin.
Shërbimet zjarrfikëse në Shqipëri përballet me pajisje dhe një flotë automjetesh tejet të vjetruara, teksa mungojnë investimet në infrastrukturën e emergjencave civile dhe zjarret na kapin çdo vit “të papërgatiru”.
Ndërkohë, Ministrinë e Mbrojtjes në reagimin e saj, për propagandë, kujdeset që të theksojë se ministri Pirro Vengu është në terren.
“Në Kalasë, Delvinë, situata paraqitet serioze për shkak të përhapjes së zjarrit nga era e fuqishme pranë zonës së banuar.
Në aksion janë angazhuar zjarrfikësit e Delvinës dhe Sarandës, efektivët e Forcave të Armatosura, zjarrfikës nga Baza e Mbështetjes së Emergjencave Civile dhe një helikopter Black Hawk.
Ministri i Mbrojtjes, z. Pirro Vengu, dhe Kryetari i Bashkisë Delvinë z. Besmir Veli ndodhen në terren, ku po ndjekin nga afër operacionin në mbështetje të banorëve dhe përpjekjet për minimizimin e rrezikut për jetën e qytetarëve.” – thuhet në reagim.
