Edi Rama, përmes një postimi në rrjetet sociale njoftoi sot se ka konceptuar një strukturë të re organizative për Bashkinë e Tiranës, e cila më vonë do të aplikohet edhe në bashkitë e tjera të vendit. Sipas kryeministrit, ky koncept i ri është bërë në bashkëpunim me institucionin e ish-kryeministrit britanik Tony Blair.
“Në bashkëpunim me Institutin Tony Blair është konceptuar një strukturë e re organizative e Bashkisë Tiranë, e cila do të adoptohet edhe në bashki të tjera, për të forcuar shtyllat bazë të mirëqeverisjes vendore.” – shkruante Rama, në një postim ku bënte thirrje për aplikim për vendet e lira për drejtimin e sektorëve të ndryshëm në bashkitë, pas valës së dorëheqjeve.
Ky ristrukturim i Bashkive, duket se është gjetur si një tjetër mënyrë që Edi Rama të paguajë me lekët e taksapaguesve shqiptarë mikun e tij, Tony Blair, të cilin e ka paguar edhe si këshilltar PR-i për Qeverinë.
Në vitin 2022, mediat britanike raportuan se Qeveria shqiptare e kishte angazhuar sërish institutin e drejtuar nga Tony Blair për këshillim në çështjet e politikës së brendshme dhe ndërkombëtare, ndërsa pretendohej se konsulencën e jepte falas.
Në vitin 2023, Tony Blair mbërriti me helikopter në Himarë, ku u aludua se helikopteri i përkiste Ministrisë shqiptare të Jashtme.
“Instituti i Tony Blair po paguhet për të këshilluar vende me rekorde të dobëta të të drejtave të njeriut, ndërsa zgjeron ndikimin e tij global. Instituti i ish-kryeministrit për Ndryshimet Globale ka lidhur një marrëveshje me qeverinë autokratike të Bahrainit, për të cilën merr kompensim, pavarësisht nga historia e shtetit të Gjirit në shtypjen politike.
Ai ka ofruar gjithashtu këshilla me pagesë për Emiratet e Bashkuara Arabe dhe vazhdon të punojë me qeverinë Saudite pas vrasjes së gazetarit Jamal Khashoggi. Gjatë vitit të fundit, raportohet se Instituti Tony Blair (TBI) ka pasur një rritje prej 50 për qind të të ardhurave nga qeveritë e huaja.
Në Bahrein, ai ka nisur të mbështesë një “program modernizimi”, i ngjashëm me punën që bën në Arabinë Saudite, ku ndihmon në hartimin e Vision 2030, një skemë për të rritur turizmin dhe për të zhvendosur ekonominë larg varësisë së gjatë nga nafta. Bahreini, një shtet me shumicë myslimane suni, ka një histori të gjatë diskriminimi ndaj popullsisë myslimane shiite, e cila përbën shumicën e 1.4 milion banorëve të vendit.
Që prej kryengritjes anti-qeveritare në vitin 2011, autoritetet kanë burgosur mijëra njerëz, përfshirë edhe udhëheqës opozitarë, shpesh në procese masive gjyqësore,” shkruante gazeta britanike ‘Telegraph’.
