Gjykata e Posaçme vijon shqyrtimin gjyqësor për çështjen e vrasjes së biznesmenit Ardian Nikulaj në Lezhë, ku i pandehur është shtetasi portugez Ruben Saraiva.
Në seancën e zhvilluar sot, dhanë dëshmitë e tyre disa persona të lidhur me hetimin, përfshirë të afërm të Edmond Haxhisë personit që dyshohet se ka ndihmuar në sigurimin e motorit të përdorur në atentat. Në dëshminë e tij, i afërmi i Haxhisë ka deklaruar se e ka takuar atë në Velipojë dhe ka parë një person me ngjyrë, por nuk mundi ta identifikonte nëse ishte Ruben Saraiva.
Gjithashtu, ka dëshmuar personi që i shiti motorin Haxhisë. Ai tha se nuk i kujtohen shumë detaje për shkak të kohës së kaluar, por kishte dhënë një deklaratë te noteri ku përshkruante fizikisht blerësit. Nga përshkrimi dyshohet se njëri prej tyre ishte pikërisht Edmond Haxhia.
Në këtë seancë dëshmuan edhe taksisti që transportoi shtetasin britanik Harry Simpson si dhe administratori i hotelit ku ai qëndroi gjatë kohës së atentatit.
Seanca e radhës është caktuar për më 15 shtator.
