Një përqafim i shkurtër në një koncert të Coldplay mund t’i kushtojë shumë CEO-së së kompanisë së inteligjencës artificiale “Astronomer”, Andy Byron. Ai u filmua duke u përqafuar dhe puthur me drejtuesen e burimeve njerëzore të kompanisë së tij, Christine Cabot, gjatë një koncerti në Boston. Videoja u përhap me shpejtësi në rrjetet sociale dhe mendohet se ka shkaktuar një krizë serioze në martesën e tij.
Gruaja e tij, Megan Kerrigan Byron, reagoi duke fshirë mbiemrin e burrit nga mediat sociale dhe më pas duke mbyllur llogaritë e saj. Edhe pse zyrtarisht nuk është bërë kërkesë për divorc, pritet që nëse ndodh, ajo të kërkojë gjysmën e pasurisë së bashkëshortit, që vlerësohet rreth 60 milionë paund – pra një ndarje që mund të arrijë deri në 30 milionë paund.
Andy Byron zotëron 5% të aksioneve të “Astronomer”, një kompani e vlerësuar në 1 miliard paund. Por përveç krizës personale, ai rrezikon edhe pozicionin në kompani. Bordi drejtues ka nisur një hetim të brendshëm, pasi marrëdhënia e tij me Cabot shihet si konflikt interesi dhe shkelje e etikës profesionale.
Rasti i Byron është kthyer në debat publik në SHBA dhe Britani, ku shumë përdorues në rrjetet sociale shprehen pro bashkëshortes së tij. Skandali po konsiderohet një paralajmërim për drejtuesit e korporatave që nënvlerësojnë ndikimin e jetës private në karrierën e tyre.
