Rreth 1500 efektivë policie do të jenë në terren për protestën e opozitës ditën e shtunë. Po ashtu edhe Forcat e Ndërhyrjes së Shpejtë, ndërsa ruajtja e institucioneve do të jetë në dorë të Gardës së Republikës.
Sipas Policisë së Shtetit, pranë bulevardit “Dëshmoret e Kombit” ku do të mbahet protesta do stacionohen edhe ambulanca dhe shërbimi zjarrfikës.
Masa ka marrë edhe Policia Rrugore, që njofton se do të ketë devijim trafiku në aksin që lidh bulevardin me qendrën.
“Do të bllokohet qarkullimi rrugor përgjatë bulevardit, kufizime do të ketë edhe në rrugët lidhëse. Nuk do të lejohet parkimi i mjeteve në këtë hapësirë që prej të premtes. Autobusët që do të sjellin protestuesit nga rrethet nuk do të lejohen të futen në qytet. Ata që vijnë nga ana veriore do stacionohen pranë stadiumit “Asllan Rusi”, ndërsa nga ana jugore tek Fakulteti Ekonomik”, njofton policia.
Sipas njoftimit zyrtar thuhet se për protestën e opozitës informacione janë marrë dhe nga SHISH.
