Problemet fizike nuk po e lënë të qetë David Alaba-n, që sapo është përballur me një tjetër dëmtim të rëndë, këtë herë në muskulin e pulpës së këmbës së majtë.
Lajmi është konfirmuar nga gazetari i njohur, Fabrizio Romano, i cili raporton se rikuperimi i mbrojtësit austriak pritet të zgjasë rreth dy muaj, duke e mbajtur jashtë fushe deri në fund të gushtit ose në fillim të shtatorit.
Ky dëmtim vjen pasi Alaba humbi gjithë pjesën e dytë të sezonit të kaluar për shkak të një këputje të ligamentit të kryqëzuar në dhjetor 2023, pas një periudhe të zgjatur me shqetësime të vazhdueshme muskulore. Që nga ajo kohë, ai ka pësuar disa dëmtime të njëpasnjëshme, përfshirë një në menisk, që i kanë kufizuar ndjeshëm praninë në fushë.
Në dy vitet e fundit, Alaba ka arritur të luajë vetëm 31 ndeshje, një shifër shqetësuese për një lojtar të këtij niveli dhe rëndësie për Real Madridin dhe kombëtaren austriake. Ky lëndim i fundit do të bëjë që ai të humbasë jo vetëm fazën përgatitore të sezonit të ri, por edhe ndeshjet e para të kampionatit 2025-26.
Në Madrid mbizotëron shqetësimi për gjendjen fizike të Alaba-s, i cili në moshën 32-vjeçare po përballet me sfidën më të vështirë të karrierës së tij. Pyetja që shtrohet tashmë është: a do të mundet sërish të rikthehet në nivelet që e bënë një ndër mbrojtësit më të mirë në botë?
