Një i vdekur dhe tre të plagosur. Ky është bilanci i një aksidenti të rëndë të ndodhur mëngjesin e sotëm, ku një makinë tip “Volkswagen” e drejtuar nga një shqiptar u përplas me stacionin e autobusit.
Mediat greke kanë bërë të ditur se aksidenti ka ndodhur rreth orës 08:20 në lagjen Metamorfozis të kryeqytetit grek dhe i vdekur mbeti një 50-vjeçar, i cili po priste në stacionin e autobusit.
Ndërkohë që raportohet se lëndime pësoi edhe vajza 9-vjeçare e shqiptarit, e cila ndodhej në makinë dhe nuk kishte vendosur rripin e sigurimit si dhe u plagos lehtë edhe një i moshuar 78-vjeçar, i cili po priste në trotuar.
Hetuesit grekë pritet t’i bëjnë testin e alkoolit shoferit shqiptar, për të parë nëse ka qenë i dehur kur shkaktoi aksidentin. Ndërkohë që rrethanat janë ende të paqarta dhe nuk dihet se si makina goditi stacionin e autobusit, në një kohë që autoritetet kanë bërë të ditur se vendi ku ndodhi përplasja është rrugë e drejtë dhe nuk ka kthesë.
“Pashë shoferin të përplasur në timon dhe pashë një vajzë të vogël në sediljen e pasme duke bërtitur ‘babi babi’. Kur e pyeta se çfarë ndodhi, më tha ‘babi po më çonte në shkollë”, – u shpreh një dëshmitar që përshkroi situatën pak çaste pas aksidentit.
