Ndeshjet e muajit qershor të Kombëtares shqiptare në kualifikueset e Botërorit 2026, kanë nxjerrë në pak një fakt që ka rënë në sy dukshëm në të dy takimet e luajtura.
Disa lojtarë të cilët ishin të paprekshëm në edicionin e mëparshëm të kualifikuesve të Europianit dhe Ligës së Kombeve, tashmë janë kthyer në zgjedhje të dyta e pak nga pak po zhduken nga fokusi.
Gjithçka është bërë shumë e dukshme me treshen Jasir Asani-Ylber Ramadani-Nedim Bajrami. Të tre ishin ndër protagonistët kryesorë të kualifikimit të Shqipërisë në Europian, të tre ishin të paprekshëm në preferencat e Silvinjos dhe titullarë të padiskutueshëm në radhët e kuqezinjve në të mirë e në të keq.
Por diçka ka ndryshuar që pas ndeshjes së parë të këtyre kualifikuesve, ndaj Anglisë. Të tre ishin titullarë në atë ndeshje shumë zhgënjyese dhe të tre pak ditë më vonë e panë veten në stolin e rezervave përballë Andorrës, duke qenë spektatorë në 90 minuta.
Situata u përsërit tani në qershor ndaj Serbisë, me Bajramin i cili hyri në fushë në minutën e 63-të e Ramadanin vetëm në 6 minutat e fundit. Për Asanin, asnjë minutë.
Shpenzimi i energjive ndaj serbëve nga titullarët nuk bindi Silvinjon që t’u japë hapësirë ndaj Letonisë dhe në ndeshjen e të martës, të tre këta futbollistë ishin përsëri mes atyre në pankinë. Bajrami ishte i vetmi që pa fushën e lojës duke u aktivizuar në minutën e 69-të. Dy të tjerët, mbetën spektatorë.
Duket si fundi i një hierarkie të krijuar për disa lojtarë që shiheshin si të paprekshëm në formacionin titullar. Tani pritet shtatori për të kuptuar etapën e radhës të këtij ndryshimi deri diku drastik të Silvinjos, i cili duhet pranuar se ka treguar se nuk e ka të vështirë të harrojë kontributin në të kaluarën të futbollistëve kuqezi. Çikalleshi, Bare e Uzuni mund ta vërtetojnë lehtësisht këtë…/Panoramasport
