Apostol Papa, bariu nga qyteti naftëtar i Kuçovës ka kërkuar ndihmën e mediave për një fatkeqësi (siç e quan ai),që i ka ndodhur dy vite mê parë. Ngjarja ka ndodhur në muajin Maj 2023.
Apolstoli kishte nxjerrë delet si çdo mëngjes për t’i çuar në kullotë dhe gjatë rrugës pa që delet kishin rënë në tokë dhe po përpëliteshin. Sapo i pa delet në tokë, Apostoli kishte dashur t’i kapë e t’i tërheqë, por kur ka parë telin e korrentit në tokë është larguar. Gjysma e tufës së deleve kishin shkelur telat e tensionit të lartë që ishin këputur dhe kishin rënë në rrugë.
Pasi 6 dele dhe një dash ngordhën në vend, Apostoli njoftoi policinë, e cila mbërriti në vendngjarje së bashku me specialistët e OSHE-së. Akti i ekspertimit të kryer nga specialistët e OSHE-së i ka përcaktuar Apostolit edhe dëmin prej 3.5 milion lekë (të vjetra), lekë që ai s’i ka marrë ende as sot, edhe pse prej dy vitesh troket çdo ditë në dyert e bashkisë dhe OSHE-së.
Bariu bën apel për ndihmë, që ai të marri dëmshpërblimin e përcaktuar sipas specialistëve pasi-siç pohon vetë ai-fajin për këtë fatkeqësi e ka OSHE-ja.
“OSHE-ja duhet të mbajë përgjegjësi dhe të më likujdojë dëmshpërblimin e përcaktuar sepse unë telin e korrentit nuk e lashë vetë në tokë, delet nuk e dinin që aty ishte teli i korrentit dhe vajtën kastile atje për të ngordhur. Kjo fatkeqësi nuk ndodhi as për fajin tim dhe as për fajin e deleve”- ka thënë bariu Apostol Papa për News24.
Ai pohon se ka dy vjet që pret lekët e dëmshpërblimit pasi gjithmonë ka dashur të shtoj tufën, me të cilën ai mban familjen. “Kjo është e vetmja mënyrë jetese për mua, me produktet e mishit dhe shitje e qumështit unë ushqej familjen”-,shprehet bariu, i cili e vetmja gjë që kërkon është pagesa e dëmshpërblimit për delet e ngordhura dy vite më parë, ngjarje për të cilën janë kryer të gjitha procedurat e kërkuara sipas ligjit, deri tek groposja e deleve të ngordhura nga bashkia.
