Seanca gjyqësore për dosjen “Metamorfoza” është shtyrë sërish nga Gjykata e Posaçme kundër Korrupsionit dhe Krimit të Organizuar, për shkak të mungesës së avokatëve mbrojtës. I vetmi i justifikuar ka qenë Sokol Tahiraj, avokati i të pandehurit Asmer Bilali, i cili dërgoi një raport se është i paaftë për punë. Me këtë raport, Tahiraj ka kërkuar dhe shtyrjen e seancës.
Në mungesë ishte dhe avokatja tjetër e Bilalit, Anila Xhafa. Kjo e fundit nuk ka justifikuar mungesën e saj, ndaj dhe është gjobitur me 30 mijë lekë.GJKKO-ja nuk ndërpreu menjëherë seancën, por caktoi sakaq për Bilalin avokaten Pranvera Doçi, për mbrojtjen e interesave e të pandehurit.Avokatja pretendoi se është njohur vetem me aktet e dosjes për të pandehurin Ardit Hasanbegajn dhe jo me aktet për të mbrojtur interesat e të pandehurit Asmer Bilali. Kujtojmë që edhe seanca paraardhësve u shty për të njëjtën arsye.Seanca e radhës është caktuar për më 5 qershor, ora 15:00.
Asnjë prej të pandehurve nuk ishte i pranishëm në sallë, pasi kishin shprehur vullnetin të përfaqësoheshin nga avokatët e tyre. Ndërkohë, avokatja e Astmer Bilalit është gjobitur me 30 mijë lekë të reja për mungesë pa arsye të justifikuar, ndërsa afatet e paraburgimit për të pandehurit janë pezulluar deri në seancën e ardhshme.
Në kuadër të operacionit “Metamorfoza”, janë arrestuar disa zyrtarë të lartë dhe persona të njohur të botës së biznesit dhe krimit. Në pranga kanë përfunduar ish-drejtuesi i forcave operacionale të Policisë së Shtetit, Oltion Bistri; drejtuesi i prokurorisë së Kukësit, Xhevahir Lita; biznesmeni Pëllumb Gjoka; si dhe Astmer Bilali, Ardit Hasanbega dhe Edmond Preka.
Oltion Bistri përballet me akuzat për “shpërdorim detyre” dhe “nxjerrje të akteve sekrete”, ndërsa prokurori Xhevahir Lita akuzohet për “korrupsion”. Një tjetër i akuzuar, ish-oficeri i policisë në Shkodër, Ardit Hasanbega, dyshohet se ka ndihmuar grupin kriminal “Bajri” për të kryer një vrasje të mbetur në tentativë ndaj Ibrahim Licit.
Ndërkohë, pjesa më e madhe e të dyshuarve të përfshirë në këtë grup kriminal, përfshirë emra të njohur si Ervis Martinaj, Denis Bajri, Klaudio Haka, Prek Kodra, Aleks Ndreka, Arsat Bashli, Bardhyl Marvraj dhe Elion Hato, vijojnë të jenë në kërkim.
Lexo edhe:
“Metamorfoza”/ Shtyhet seanca gjyqësore për Pëllumb Gjokën, Oltian Bistrin dhe të pandehurit e tjerë
