Qeveria suedeze ka nisur t’u shpërndajë familjeve të vendit fletushka, ku për të parën herë në më shumë se gjysmëshekulli përcillen udhëzime sesi duhet reaguar në rast lufte.
Fletat me titull “Om krisen eller kriget kommer” (Nëse vjen kriza e luftës), iu janë shpërndarë 4.8 milionë familjeve dhe shpjegojnë sesi njerëzit mund të sigurojnë nevojat bazike si ushqimi, uji dhe ngrohja.
Përveç tyre, ato tregojnë atyre çfarë nënkuptojnë sinjalizimet, ku të gjejnë strehime nga bombat dhe si të kontribuojnë në mbrojtjen totale të Suedisë.
20 faqet e ilustruara me sirena, avionë luftarakë dhe familje që u largohen shtëpive të tyre, e përgatisin popullatën edhe për rreziqe të tjera, si sulmet kibernetike apo ato terroriste, ndryshimet klimatike dhe mënyrat e identifikimit të lajmeve të rreme.
“Ndonëse Suedia është më e sigurtë sesa shumë vende të tjera, rreziqet që kërcënojnë sigurinë dhe pavarësinë tonë nuk mungojnë”, thuhet në broshurë.
“Nëse jeni të përgatitur, ju kontribuoni në përmirësimin e aftësisë së vendit tuaj për t’i bërë ballë një vështirësie shumë të madhe”.
Fletëpalosje të ngjashme janë shpërndarë për herë të parë në Suedinë neutrale gjatë vitit 1943, në kulmin e Luftës së Dytë Botërore. Përditësime u lëshuan më pas rregullisht për publikun deri në vitin 1961, ndërsa për zyrtarët lokale dhe ata qeveritarë, kjo praktikë vazhdoi të ndiqej deri në vitin 1991.
