Operacioni i fundit i përbashkët mes SPAK dhe autoriteteve italiane, i koduar “URA”, ka zbuluar lidhje të thella mes botës së krimit dhe sektorit të ndërtimit në Shqipëri. Një nga grupet kriminale të goditura në këtë aksion është ai i Elvis Doçit, i njohur ndryshe si “Visi i Pojës”, i cilësuar si drejtues i një rrjeti kriminal në Durrës. Ai aktualisht është në kërkim dhe ndaj tij është lëshuar urdhër-arresti, ndërsa kompania e tij “Port Side” është sekuestruar.
Hetimet kanë zbuluar se aktiviteti i Doçit nuk kufizohej vetëm në këtë kompani. Ai rezulton të jetë gjithashtu bashkëpronar në kompaninë ndërtimore “Eldemar Construction”, e cila në vitin 2023 ka përfituar leje për ndërtimin e një hoteli 10-katësh në Durrës.
Projekti është regjistruar në emër të shoqërisë “Rock of Kavaja” shpk, ku “Eldemar Construction” zotëron 40% të aksioneve, ndërsa pjesa tjetër prej 60% i përket “CFO Pharma”, kompani nën pronësinë e Nadir Çaushollit, biznesmen i farmaceutikës përfitues i miliona lekëve në tendera e po ashtu pronari i linjës së autobuzëve të unazës Green Line në kryeqytet. Çausholli ka qenë objekt i një atentati me armë në mars të këtij viti.
Leja për ndërtimin e këtij hoteli është dhënë nga Këshilli Kombëtar i Territorit. Megjithëse në dokumentacionin zyrtar figurojnë përfaqësues formalë, analiza e strukturës pronësore dhe historikut të personave të përfshirë nxjerr në dritë fakte shqetësuese.
Elvis Doçi kishte emëruar si përfaqësues të kompanisë “Eldemar Construction” ish-policët Denis Tafili dhe Gëzim Hasa, të dy të arrestuar në Itali në vitin 2016 për trafik droge, përkatësisht për përpunim dhe shpërndarje heroine.
Ndërkohë, hetimet vazhdojnë dhe strukturat e drejtësisë janë në fokus për të zbuluar se në çfarë mase është përfshirë Çausholli në veprimtaritë e ortakëve të tij./JOQ ALBANIA
