Viktor Gyokeres vazhdon të shënojë gola në elitë e futbollit portugez. Sulmuesi suedez 26-vjeçar, sipas informacioneve të publikuara nga gazeta portugeze ‘A BOLA’, pëlqehet shumë nga Arsenali, që po përgatit blerjen e tij gjatë merkatos së verës.
Aktualisht, lojtari është i përqendruar te fundi i kampionatit dhe titulli në Liga Portugal, që duket shumë pranë, por interesimi i Arsenalit është serioz.
Sipas raportimeve nga mediet portugeze, Arsenali i ka dërguar Gyokeres-it një ofertë page prej rreth 8.3 milionë euro neto në sezon, për një kontratë katër ose pesëvjeçare.
Klubi londinez e ndjek që prej kohësh lojtarin e lindur në vitin 1998 dhe, së bashku me Alexander Isak, ai gjendet në një listë të ngushtë të Mikel Artetës.
Megjithatë, trajneri spanjoll e sheh Gyokeres-in si një goditje më të leverdishme krahasuar me sulmuesin e Neëcastle për dy arsye: është më pak i kushtueshëm dhe megjithatë garanton një numër të jashtëzakonshëm golash.
Aktualisht, Arsenali ende nuk ka paraqitur një ofertë zyrtare te Sportingu, që zotëron kartonin e sulmuesit, pasi drejtuesit nuk duan të shpërqendrojnë asnjë nga objektivat aktualë të sezonit.
Por klubi anglez është i vetëdijshëm për dakordësinë e lojtarit dhe agjentit të tij, dhe largimi pritet të ndodhë për një shumë më të ulët se klauzola prej 100 milionë eurosh. Vlerësohet se marrëveshja mund të mbyllet për 70-75 milionë euro, shumë që mund të vihet në tryezë në momentin e duhur.
