Një vendim i beftë, i janarit të këtij viti, u lejon bashkive që të japin leje ndërtimi deri në 250 metër katrorë brenda brezit bregdetar. Madje, pushteti lokal ka marrë në dorë që, në lejet egzistuese, të miratojë shtesë ndërtimi apo të “legalizojë” dhe plotësojë dokumentet e lejeve të dhëna vite më parë, që janë zvarritur.
Sipas vendimit të KKTU-së, rezulton se disa bashki që administrojnë edhe zonat bregdetare do të kenë dorë të lirë në ndërtimet e vogla, tip kioskash apo të “ndihmojnë” ata që kanë zaptuar truall në plazh që t’i bëjnë me dokumente. Por, mund të vendosin që ndërtimet të ndryshojnë edhe funksione, pavarësisht lejes së marrë në të kaluarën.
Vendimi është një “amnisti” e vogël e qeverisë për bregdetin, duke tentuar që t’i hapë rrugë privatizimit apo edhe shfrytëzimit.
Vendimi i mësipërm ëhtë marrë në datën 28 janar 2025 nga Këshilli Kombëtar i Territorit dhe Ujit. Ky këshill ka marrë një vendim me numër 62, për “përcaktimin e procedurave që do të ndiqen nga autoritetet e zhvillimit të territorit për shqyrtimin e aplikimeve, brenda brezit bregdetar”.
“Ky këshill, e propozimin e Agjencisë së Zhvillimit të Territorit vendosi që brenda brezit bregdetar, autoritetet vendore të zhvillimit të territorit lejohet të miratojnë leje zhvillimi ndërtimi, prishje, rikonstruksione, riparime, shtesa, ndryshim projekti gjatë ndërtimit, ndryshim të subjekteve zhvilluese dhe ndryshim i aktiviteteve, funksionave, shtyrje afati dhe çdo leje tjetër të përmendur në Rregulloren e Zhvillimit të Territorit” thuhet në vendim.
Sipas saj, pushteti lokal të kryejë procedurat administrative për të gjithë aktet apo dokumentet përkatëse, deri në lëshimin e certifikatës së përdorimit, vetëm për këto raste përjashtimore;
A) Ojekte të reja me sipërfaqe të përgjithshme deri në 250 m2.
B) Rikonstruksionet e objekteve ekzistuese, leja për të cilat është dhënë nga autoritetet vendore të zhvillimit të territorit
C) Shtesa në objektet ekzistuese
D) Rrjetet e infrastrukturës publike vendore, rrjetete furnizimit me ujë, grumbullimit dhe trajtimit të ujërave të përdorura, që shtrohen brenda territorit të një njësia të vetëqeverises vendore
E) Objektet shtetërore në pronat shtetërore të transferuara tek njësitë e qeverisjes vendore
F) Objektet e dëmtuara si pasojë e fatkeqësisë natyrore infrastruktura publike dhe ose kritike si dhe ndërtimet e reja në zonat e dëmtuara nga fatkeqësia natyrore
G) Rrjetete fibrave optike
H) Muret rrethuese.
Në vendim përcaktohet se autoritetet e zhvillimit të territorit duhet të vijojnë procedurat në përputhje me kushtet dhe rregullat e përcaktuara në rregulloren e Zhvillimit të Territorit për të gjitha rastet e përmendura në pikën 1.
Sipas saj, autoriteti vendor i drejton Agjencisë së Zhvillimit të Territorit në rrugë elektronike kërkesën për marrjen e konformitetit, sëbashku me dokumentacionin shoqërues.
Më pas, Agjencia e Zhvillimit të Territorit i përgjigjet autoritetit vendor të zhvillimit në rrugë elektronike nëpërmjet sistemit elektronik të lejeve brenda 10 ditëve pune. Pas marrjes së njoftimit të AZHT-së për konformitetin e zhvillimit të propozuar, autoriteti vendor vijon procedurën për miratimin e lejes përkatëse.
Në pikën 3 të këtij vendimi thuhet se për të gjitha rastet e tjera të cilat nuk përfshihen në pikën 1 të këtij vendimi, autoriteti kompetent për vendimmarrës brenda brezit bregdetar është KKTU-ja.
Ndërkohë, kërkesat për kryerjen e punimeve mbi bazën e një “deklarate paraprake për kryerjen e punimeve” do të paraqiten dhe shqyrtohen pranë autoriteteve vendore të zhvillimit të territorit, me përjashtim të kërkesave për stacione plazhi që janë objekt i një leje ndërtimit nga KKTU./VoxNews
