Hendeku i thellë mes pagave dhe pensioneve ka bërë që inflacioni të rëndojë mbi të moshuarit.
Rritja e pensionit mesatar ka ecur me ritme të ngadalta dhe fuqia blerëse e pensionistëve ka rënë ndjeshëm. Të dhënat tregojnë për rritje të pabarazisë mes pensionistëve dhe personave të punësuar e me gjasë hendeku do të zgjerohet gjatë viteve të ardhshme.
Teksa paga mesatare në vend ka pësuar rritje përgjatë dy viteve të fundit, masa e pensionit mesatar ka ecur me ritme të ngadalta. Në vitin 2024 paga mesatare mujore bruto u rrit rreth 10% krahasuar me 2023-shin, ndërsa në tetor të 2024-ës pensioni mesatar rezultoi vetëm 4% më i lartë se viti i mëparshëm. Sipas Monitor, vitin e kaluar pensioni mesatar ishte sa 24.6% e pagës mesatare mujore bruto, ndërsa dhjetë vite më parë pensioni mesatar ishte sa 32% e kësaj page.
Por fuqia blerëse e pensionistëve ka rënë edhe më tej nga diferenca e thellë ndërmjet pagave dhe pensioneve, çka thellon pabarazinë mes pensionistëve dhe pjesës tjetër të shoqërisë.
Rritja e pagave në sektorin publik dhe atë privat është shoqëruar me rritje të çmimeve në disa produkte të shportës që janë jetike për pensionistët dhe sipas përcaktimeve të INSTAT një pensionist konsiderohet i varfër, nëse pagesa mujore është më pak se gjysma e pagës mesatare në shkallë vendi. Ky hendek është thelluar vitet e fundit, për shkak se pagat po rriten me ritme më të larta se pensionet.
Të dhënat tregojnë për rritje të pabarazisë ndërmjet shtresave të shoqërisë, në këtë rast të pensionistëve dhe personave të punësuar e me gjasë hendeku do të zgjerohet gjatë viteve të ardhshme. Ndërkaq, plagët e tranzicionit po ulin përfitimet nga pensioni.
Numri i pensionistëve, që nuk përmbushin vitet e punës dhe nuk arrijnë të përfitojnë një pension të plotë pleqërie, po rritet me shpejtësi. Të dhënat zyrtare nga instituti i Sigurimeve Shoqërore tregojnë se në 6-mujorin e parë të 2023-shit, pensionistët me pagesë të pjesshme përbënë 50% të totalit të personave që përfitojnë pension pleqërie, nga 45% që ishte në 2021-shin./ Syri tv
