Dy partitë populiste të Italisë, po përpiqen sot të finalizojnë marrëveshjen për krijimin e një qeverie dhe të hartojnë një draft që kërkon çlirimin nga borxhi miliarda eurosh nga ana e Bankës Qendrore Evropiane.
Drafti, kërkon sipas mediave italiane anulimin e 250 miliardë eurove bono të shtetit italian të blera nga Banka Qendrore Evropiane. Italia në fakt është vendi me borxhin e dytë publik më të madh në eurozonë. Drafti përbëhet nga 39 fletë dhe palët thonë se po punojnë ende për të. Por disa detaje të tij, do të alarmojnë Bashkimin Evropian.
Po ashtu ka edhe një kërkesë për ndryshim radikal të paktit për stabilitetin dhe rritjen e BE, që ka rregulla strikte për mbajtjen e deficiteve buxhetore nën 3 për qind të produktit bruto. Dy partitë planifikojnë një buxhet me vlerë dhjetëra miliarda euro, me planet për një tavan të ri të pagave minimale dhe një taksë të sheshtë prej 15 për qindësh për personat me të ardhura të vogla dhe të mesme.
Ata vazhdojnë të debatojnë për emigracionin që ata e konsiderojnë të papërballueshëm nga italia. Planet e tyre mund edhe të sfidojnë rregullat e BE. Ende nuk ka asnjë emër për atë që do të udhëheqë qeverinë pasi as Di Maio dhe as Salvini nuk e duan detyrën e kryeministrit.
Dy liderët e partive kanë akuzuar BE se po ndërhyn në procesin e bisedimeve. Lideri i Ligës së veriut, Mateo Salvini dënoi ndërhyrjen e papranueshme të BE ndërsa Luigi di Maio, i lëvizjes pesë yjet, foli për sulme të vazhdueshme nga eurokratët. Di Maio mori në shënjestër edhe Financial Times për një shkrim me titullin Roma hapën portat për barbarët modernë.
Gazeta paralajmëronte se Italia ishte në prag të krijimit të qeverisë me më pak eksperiencë dhe më jokonvencionale që do të drejtojë një demokraci të evropës perëndimore që nga marrëveshja e Romës e 1957 për themelimin e BE. Sidoqoftë, të martën, dy komisionerë evropianë bënë të qartë se rregullat janë rregulla dhe se nuk ka përjashtime për asnjë shtet anëtar. Komisioni pret që Italia, me çdo kusht, të ulë borxhin e saj.
