Piloti australian Oscar Piastri fitoi garën e Cmimit të Madh të Kinës në Formula 1, suksesi i tretë në karrierë. Një sukses i dyfishtë për makinën McLaren, që ashtu si dy javë më parë, dominoi në pistë me të dy pilotët e saj. Britaniku Lando Norris u rendit në vendin e dytë, ndërkohë që në podium u ngjit edhe George Russell me Mercedes (i treti).
Këta tri pilotë bënë një garë më vete, duke patur një diferencë sigurie prej tyre gjatë gjithë garës. Një garë pa shumë emocione, me pak parakalime mes pilotëve të kreut. Në vendin e katërt u rendit Max Verstappen me Red Bull, që tri xhiro nga fundi parakaloi Charles Leclerc, i pesti me Ferrari. Makina italiane edhe këtë garë zhgënjeu në pistë.
Në vendin e gjashtë u klasifikua Lewis Hamilton, i vetmi nga pilotët e kreut që kreu dy ndalesa për gomat. Në zonën e pikëve u renditën edhe Esteban Ocon (Haas), Kimi Antonelli (Mercedes), Alexander Albon (Williams) e Oliver Bearman (Haas).
Edhe gara e Red Bull ishte anonime, me Verstappen që për asnjë moment nuk ishte në gjendje të duelonte për fitoren (makina tjetër u rendit e 16-ta). Ajo që bie në sy është dominimi McLaren, që në dy garat e para ka arritur dy fitore të dyfishta.
