Papa Francesku del sot nga spitali, Vatikani: Do të përshëndesë besimtarët në meshën e së dielës

Pavarësisht se ka qenë i tërhequr dhe pak i dukshëm, ai ka dashur të jetë pranë besimtarëve në këtë periudhë të rëndësishme të Pashkëve, momenti më i shenjtë për të krishterët. Me daljen nga spitali, agjenda e Papës pritet të ndryshojë ndjeshëm.

Pjesëmarrja e tij në ritet e Pashkëve do të varet nga përparimi i shëndetit. Për udhëtimin e planifikuar në Turqi në fund të majit, mjekët shprehen se ende nuk ka siguri nëse mund të realizohet. Gjatë fazës së rikuperimit, Papa do të shmangë takimet me grupe të mëdha, pasi mund të jenë të rrezikshme për shëndetin e tij.

Mjekët konfirmuan se gjendja klinike e Papa Françeskut është e qëndrueshme prej dy javësh. Gjatë ditëve të fundit Papa Françesku nuk kishte më nevojë për maskën e oksigjenit gjatë natës, nisi të ushqehej normalisht, ndjente më shumë energji dhe u kthye në punë.

Një tjetër faktor që ndikoi në vendimin për ta kthyer në Vatikan ishte rreziku i infeksioneve spitalore, një shqetësim serioz për pacientët e moshuar pas një sëmundjeje të rëndë. Mjekët kanë rekomanduar reduktimin e pjesshëm të terapisë me antibiotikë oralë dhe pushim të plotë.

Lajmi i largimit të Papa Franceskut nga spitali u dha gjatë lutjes së mbrëmjes së djeshme nga Monsinjor Giordano Piccinotti, president i APSA-s dhe u prit me duartrokitje.

Papa do të vazhdojë terapitë e filluara në spital. Lidhur me rikuperimin e zërit, mjekët theksojnë se është e vështirë të parashikohet, por përmirësimet e fundit kanë qenë të shpejta, çka mund të sinjalizojë një kohë të shkurtër rikuperimi. Pneumonia bilaterale ka dëmtuar mushkëritë dhe ka ndikuar në muskujt respiratorë, duke ndikuar kryesisht te zëri i tij.