Sali Berisha, gjatë prononcimit për mediat jashtë godinës së SPAK, hodhi akuza se Edi Rama i ka dërguar Erion Veliajt në qeli Xhevdet Troplinin, i njohur ndryshe si “Poja” për t’i përcaktuar kushtet, sipas tij, njësoj siç bëri para dy vitesh me Lefter Kokën.
Berisha tha se Xhevdet Tropilini, i njohur si “Poja”, bën “ligjin” dhe është zotëruesi absolut i Portit të Durrësit, por gjithsesi, lideri demokrat tha se opozita do të fitojë në zgjedhjet e 11 Majit në qytetin bregdetar.
“Redaktori mundet ose jo të jetë takuar me Erion Veliajn. Fjalët janë fjalë dhe faktet janë fakte. Ata që më kanë informuar, ka qenë Uluziu. Tani kamerat do tregojnë shumë gjëra. Kamerat do tregojnë edhe ato që kam njoftuar unë para jush. Thuhet se një natë i shkoi edhe Poja atij dhe ia vuri ca kushte. Xhevdet Troplini është Poja, është zotëruesi absolut i Portit të Durrësit, i cili bën ligjin dhe i ka dhënë njëlloj siç i pati bërë Lefterit para dy vjetësh, tani Rama thuhet se ia çoi në qeli atij dhe ai ka përcaktuar kushtet. Ky është Poja, Poja është i njohur… Betejën në Durrës e kemi më të fituar se kurrë. Populli i Durrësit është i vendosur të mos ketë më asnjë ndikim nga banditët, nga trafikantët dhe nga qeveritarët, të cilët të turpëruar nga të gjitha anët, kanë zhdukur deputetët e mëparshëm… Ku e kanë Çyrben? Të gjithë u zhdukën. Edi Rama erdhi në Tiranë në listë të mbyllur. Durrësi është i mbyllur. Në Durrës opozita do ketë fitoren më të thellë në historinë e saj.” – tha Sali Berisha.
Sipas Berishës, ishte Ulsi Manja, ai i cili futi në kurth Veliajn duke i futur “çimka” kudo në qeli.
“Erion Veliaj është regjistruar edhe duke folur në telefon fiks, edhe duke fjetur në shtratin e tij, edhe duke u ulur në tavolinë. Atë e kishin mbushur me sa duket me çimka në të gjitha anët. Po, çdo i burgosur apo i paraburgosur ka të drejtat e tij. Dhe përdorimi i kurtheve të vjetra, t’i çosh Uluziun për t’i dhënë siguri dhe më pas të kryesh këto veprime, do të thotë se kalon çdo lloj përmase, është si në tragjeditë e vjetra.” – tha Berisha.
