Ermal Meta rrezikon të mbyllë sezoni para kohe. Lojtari i Tiranës dhe i përfaqësueses Shpresa u dëmtua në takimin që bardheblutë zhvilluan me Dinamon.
Pas asaj ndeshjeje, ai nuk është stërvitur dhe ka bërë terapi, madje në takimin me Laçin mungoi. Futbollisti nuk ishte as në stolin e rezervave, ndërsa pas takimit është konfirmuar zyrtarisht se lojtari është i dëmtuar dhe do të mungojë gjatë.
Informacionet nga bardheblutë bëjnë me dije se Meta ka një tërheqje të gradës së parë. Në këto kushte, ai nuk mund të luajë dhe do të jetë një mungesë e madhe për skuadrën në sfidën me shkodranët dhe jo vetëm.
Diagnoza e dhënë nga mjekët, do të thotë se futbollisti nuk do të luajë të paktën për një muaj. Duke llogaritur se sot është 10 mars, Meta në rastin më të mirë mund të jetë në fushë të paktën në mes të prillit.
Kjo do të thotë se lojtari, i cili luan si në mbrojtje dhe në mesfushë, rrezikon të ketë mbyllur sezonin futbollistik. Lojtari, në këto kushte, do të ishte një humbje e madhe për skuadrën bardheblu, pasi Shkëmbi nuk do të ketë në dispozicion një titullar.
Meta është lojtari i dytë që mund të humbasë sezonin. Para tij, Qëndrim Ismajli i ka dhënë “lamtumirën” sezonit. Futbollisti ka një thyerje dhe nuk do të jetë në dispozicion të Bledi Shkëmbit deri në fund të prillit.
