Udhëtarët që përdorin pikën kufitare në mes të Kosovës dhe Shqipërisë, nga 1 marsi duhet të paraqesin dokumentet e identifikimit.
Marrëveshja e lëvizjes së lirë mes pikave kufitare të Vërmicës dhe Morinës, nga 1 marsi ka pushuar së funksionuari për një periudhë dymujore.
Gjatë kësaj kohe pikat kufitare të Shqipërisë dhe Kosovës, do të bëjnë përpunimin e të dhënave të drejtuesve të automjeteve dhe udhëtarëve me procedurë të përshpejtuar.
Udhëtarët që e shfrytëzojnë pikën kufitare në mes të Kosovës dhe Shqipërisë, duhet të paraqesin dokumentet e identifikimit, për arsye se do të bëhet përpunimi i të dhënave të sakta i automjeteve.
Nga policitë kufitare bëhet një regjistrim i shpejtë i mjetit dhe një kontroll rutinë i dokumentit të identifikimit për drejtuesin e mjetit.
Kjo procedurë e lehtësuar kontrolli vlen vetëm për shtetasit e Shqipërisë dhe Kosovës përgjatë ditëve të javës, ndërsa në fundjavë aplikohet kalimi i kufirit pa kontrolle.
Procedura do të jetë në fuqi deri më 30 prill, ndërsa nga data 1 maj rikthehet procedura e lehtësuar e kalimit të kufirit pa kontrolle për periudhën nëntëmujore të sezonit turistik në të gjitha pikat e kalimit të kufirit Shqipëri–Kosovë.
Pika kufitare e përbashkët Shqipëri-Kosovë, përpunon numrin më të madh të automjeteve dhe udhëtarëve që hyjnë dhe dalin në të dyja anët e kufirit.
Shqipëria dhe Kosova kanë pesë pika të përbashkëta të kalimit të kufirit dhe 21 vendkalime kufiri pa kontrolle për fshatrat e brezit kufitar nga Kukësi në Tropojë në një distancë 30 km në të dy anët e kufirit.
