Rusia ka dërguar raketat e para tokë-ajër të llojit S-300 Iranit duke zbatuar një kontratë të firmosur në vitin 2007.
Nga kjo duket se Shtetet e Bashkuara të Amerikës janë frikësuar pasi dyshojnë se Irani mund t’a përdorë këtë sistem raketash për të mbrojtur zonat e zhvillimit të programeve bërthamore.
Lajmi për nisjen e procesit të dërgimit të armative u konfirmua edhe në rrugë zyrtare nga zëdhënësi i ministrisë së Jashtme iraniane Hossein Jaberi-Ansari, i cili tha se ka përfunduar faza e parë e zbatimit të kontratës, por nuk bëri me dije numrin e raketave të vendosura në Iran.
Mësohet se kjo kontratë është kundërshtuar ashpër nga Shtetet e Bashkuara, Izraeli dhe Arabia Saudite.
Akordi i arritur më herët për shifrën e 800 milionë dollarëve u pezullua fillimisht nga Vladimir Putin në vitin 2010 për shkak të kërcënimeve të perëndimit në lidhje me mundësinë e vendosjes së sanksioneve ndërkombëtare, por më pas u riaktivizua sërish me urdhërin e Liderit të Kremlinit.
Ende nuk ka asnjë reagim nga Shtetet e Bashkuara ose vendet e tjera të cilat kanë shprehur kundërshtinë e tyre në lidhje me dërgimin e raketave në Iran, ndaj nuk dihet nëse do të ketë një propozim real për të vendosur sanksione ndaj Iranit dhe Rusisë.
Raketat tokë ajër të llojit S-300 mund të përdoren për të qëlluar objektiva të ndryshëm siç mund të jenë avionët ushtarakë si dhe raketat e tjera që mund të përbëjnë një kërcënim. Megjithatë, Shtetet e Bashkuara dyshojnë se Irani mund t’a përdorë këtë sistem raketash për të mbrojtur zonat e zhvillimit të programeve bërthamore.
Më herët Teherani firmosi një marrëveshje për të evituar sanksionet në këmbim të braktisjes së zhvillimit të programeve nukleare. Megjithatë, implementimi i marrëveshjes së arritur me Rusisë për blerjen e raketave tokë-ajër mund të ngrihet si problematikë në mbledhjet e Organizatës së Kombeve të Bashkuara.
