Pas deklaratave të kryeministrit Edi Rama për futjen e mësimit të fesë si lëndë mësimore në shkollë, ka reaguar akademiku Artan Fuga. Ai deklaron se kjo ide ka krijuar konfuzion dhe kaos si në çdo institucion dhe shpreh krizën e përgjithshme të arsimit.
“Mësimi i fesë në shkollë! Konfuzion i paparë edhe i propozimit fillestar edhe i kundërshtimeve, edhe i orekseve të klerikëve. Kaos total si kudo, në institucione, në prona, privatizime, etj. Do t’ju tregoj absurdin e moskuptimit që ridoli në pah e marrëdhënies midis shkollës dhe fesë. Kaos që shpreh krizën e përgjithshme të arsimit për të cilën po u bie kambanave që nuk duan t’i dëgjojnë”, deklaron Fuga.
Më tej ai ka kundërshtuar Ministren e Arsimit, Lindita Nikolla duke u shprehur se mësimi i fesë dhe kultura fetare janë dy gjëra identike.
“I lutemi ministrisë të arsimit të kuptojë se feja dhe kultura fetare janë identikë. Prandaj me përulje lusim përsëri të mos nxitohen në deklarata që tregojnë padije duke pohuar se fusin kulturën fetare por jo fenë. Mos ju lutemi!”, shkruan Fuga.
Dy ditë më parë kryeministri Rama deklaroi se ka ardhur koha që shkollat publike të hapin dyert për njohjen e besimeve fetare dhe se projekti i qeverisë nuk cënon laicitetin e shkollës.
