Mjeku epidemiolog Ilir Alimehmeti ka folur sërish për rastet e meningjitit në Shqipëri.
Alimehmeti vë në dukje se rastet janë shumë të rralla dhe vatrat e izoluara dhe pavarësisht kujdesit që çdo kush duhet të ketë, mjeku thotë se nuk jemi në rastet e një epidemie.
”Meningjiti është një sëmundje shumë e rrallë. Sa i takon simptomave, ato nuk të lënë hapësira dyshimi. Nëse dikush ka dyshim nëse ka apo nuk ka meningjit, përgjigja është se nuk ka sepse simptomat janë tejet dalluese. Që prej ngurtësimit të qafës, pra i sëmuri e ka të pamundur të lëvizë qafen, temperaturë, ftohje të duarve dhe këmbëve, konfuzion, nervozizëm, irritim ndaj dritës, përgjumje e thellë. Zakonisht preken fëmijët.
Sa më i vogël fëmija, aq më i madh rreziku.
Por nuk bëjnë përjashtim as të rriturit. Numrat janë të vegjël. Ne kemi pasur raste vit pas viti, por janë shumë sporadike dhe aspak për t’u shqetësuar. Rastet janë të rralla, edhe kur ndodhin janë të dukshme dhe shumica prej nesh është i ekspozuar çdo ditë ndaj këtyre baktereve në përditshmëri. Meningjiti nuk transmetohet aq lehtë sa mendohet. Duhet një kontakt tejet i ngushtë dhe i gjatë me të sëmurin.
Dezinfektimi nuk është i domosdoshëm, sepse bakteret qëndrojnë në trupin e njeriut dhe jo në ambiente të jashtme. Dezinfektimi më shumë na qetëson mendërisht, por nuk ka ndikim tjetër në izolim”, tha mjeku Alimehmeti.
