Federata e Futbollit të Rumanisë ka humbur apelimin kundër dënimit të dhënë nga UEFA për këngët raciste të tifozëve të saj gjatë ndeshjes kundër Kosovës në Ligën e Kombeve, nëntorin e kaluar.
Si pasojë, Rumania do ta luajë ndeshjen e saj të parë shtëpiake në kualifikueset për Kupën e Botës 2026 me dyer të mbyllura, kundër Bosnjë-Hercegovinës, më 21 mars.
Ky rast është i pari nga dy apelime të ndryshme në Gjykatën Arbitrare të Sportit (CAS) lidhur me ndeshjen e trazuar Rumani-Kosovë.
Gjatë takimit, tifozët rumunë kishin hedhur slogane pro-Serbi, të cilat ishin ofenduese për lojtarët dhe tifozët e Kosovës. Si pasojë, ekipi i Kosovës refuzoi të vazhdonte lojën. Më pas, UEFA i dha Rumanisë fitoren 3-0 në tavolinë.
