Policia e Tiranës ka arrestuar edhe personin e dytë të shpallur në kërkim një ditë më parë në kuadër të operacionit të koduar “Unknown”. Në pranga është vënë shtetasi Arsen Matollari, 32 vjeç nga Durrësi.
Ai akuzohet se së bashku me 26-vjeçarin Ervis Belollari, të arrestuar një ditë më parë, i kanë marrë 6 mijë euro përmes mashtrimit një biznesmeni, duke iu prezantuar si kryebashkiak.
Policia raporton se në banesën e Arsen Matollarit janë gjetur 4700 euro të cilët janë sekuestruar në cilësinë e provës materiale së bashku me automjetin me të cilin lëviznin dy të rinjtë.
Ata kanë telefonuar biznesmenin, ku i kanë kërkuar 6 mijë euro, duke u prezantuar si një kryebashkiak dhe më pas kanë lënë takim, ku kanë marrë shumën lekëve. Momenti i marrjes së lekëve ka qenë i filmuar me kamer sigurie.
Më pas ata kanë telefonuar biznesmenin sërish duke i kërkuar edhe 7 mijë euro të tjera, me arsyetimin se kanë një familjar në spital, por në këtë moment biznesmeni e ka kuptuar dhe ka bërë kallëzim në Polici.
Ervis Belollari është një personazh i njohur në rrjetin social “TikTok”, ku njihet dhe me nofkën “Delluksi”, teksa ka punuar dhe si aktor figurant në serialet turke.
Biznesmeni i mashtruar rezulton të jetë nga qyteti i Lushnjes dhe kishte aktivitet në tregun e bimëve medicinale.
Materialet procedurale i kaluan Prokurorisë së Tiranës për veprime të mëtejshme.
