Klubet e multimedias në shkollat e Veriut të Shqipërisë po angazhojnë gjimnazistët në prodhimin e dokumentarëve dhe produksioneve kinematografike, duke ndihmuar në adresimin e problematikave të komuniteteve ku jetojnë, por duke shërbyer edhe si një alternativë për të rigjallëruar jetën kulturore.
Në gjimnazin e Peshkopisë, “Said Najdeni”, nxënësit e angazhuar në programin “Rrugë alternative”, po marrin njohuritë e nevojshme mbi ideimin, xhirimet në terren dhe prodhimin e produksioneve filmike, që do të shfaqen para bashkëmoshatarëve të tyre dhe publikut të Dibrës.
Gjimnazistët u ndanë në disa ekipe për të mundësuar prodhimin e një filmi me metrazh të shkurtër, një dokumentari mbi historinë dhe ndryshimet demografike në Dibër dhe një podcast, ku nxënësit vendosen në rolin e gazetareve dhe intervistojnë bashkëmoshatarët e tyre, mësuesit, përfaqësues të komuniteteve dhe drejtues të institucioneve.
Laboratorët e multimedias në shkollat e Veriut, me financim të qeverisë britanike dhe nën mbikqyrjen e British Council, janë pajisur me kabinete të mirëfillta produksioni: Kamera, mikrofonë, pult zëri, pika montazhi për të përgatitur të rinjtë dhe të rejat në fushën e medias, filmit dhe prodhimit të dokumentarëve.
Këto nisma synojnë të përgatisin të rinjtë dhe të rejat në gjetjen e rrugëve alternative për ta ndërtuar të ardhmen në vendlindjet e tyre.
