Forma e shkëlqyer e Bayer Leverkusen ka bërë që sytë e Europës të jenë të përqendruar te Xabi Alonso dhe Florian Wirtz, dy figurat kyçe të suksesit të ekipit gjerman. Të dy janë shumë të kërkuar nga klubet e mëdha.
Xabi Alonso është lidhur prej muajsh me Real Madridin si pasues i mundshëm i Carlo Ancelottit, ndërsa Florian Wirtz konsiderohet një nga talentet më premtues të futbollit gjerman, me shumë gjigantë europianë që e ndjekin nga afër.
Megjithatë, Leverkusen nuk ka ndërmend t’i lërë të largohen. Këtë e ka konfirmuar Simon Rolfes, drejtori i përgjithshëm i klubit, në një intervistë për “Sky Sports”: “Po, ekziston mundësia që të dy të qëndrojnë në klub edhe pas verës. Të dy kanë kontratë dhe ndihen rehat këtu”.
Për më tepër, Rolfes shprehu optimizëm për rinovimin e kontratës së Florian Wirtz, e cila aktualisht skadon më 2027: “Ende mungon firma dhe disa detaje për t’u sqaruar. Përndryshe, do ta kishim njoftuar tashmë”.
Një verë e gjatë dhe e nxehtë pritet në Leverkusen, me klube të mëdha që do të bëjnë përpjekje për të rrëmbyer yjet e ekipit. A do të mundet Bayer t’i mbajë?
