Emisioni Fiks Fare denoncoi një parregullsi në Burgun e Lezhës, ku qindra gardianë dhe ish gardianë po vuajnë pasojat e abuzimit me detyrën.
Në redaksinë e emisionit investigativ u ankua z. Pjetër Pjetri dhe Agustin Buna, ish-gardianë, të cilët thanë se atyre dhe 270 punonjësve të tjerë, s’u janë paguar kontributet e suplementit ushtarak të pensionit.
Ata pohojnë se koha që nuk janë paguar është nga muaji korrik 2009 deri në dhjetor 2010. “Jemi ankuar deri në Ministrinë e Drejtësisë dhe na mbajnë me shpresë, ka 3 vjet dhe po na gënjejnë. Na kanë dërguar letra dhe në total ne jemi 275 persona që kanë këtë problem. Gabimi është bërë nga financa e atëhershme e Burgut të Shën Kollit, e cila duhet t’i kishte paguar. Ata harruan me apo pa dashje dhe tani ne na del mangut pensioni. Mua përshembull më del rreh 2 mijë lekë në muaj më pak” thotë ish-gardiani Pjetër Pjetri.
Ai shton se, të njëjtin problem e kanë shumë punonjës dhe deri më sot s’kanë marrë asnjë zgjidhje. “Asnjë masë edhe për ata punonjësit, disa janë larguar dhe të tjerë ngritur në detyrë. Ne e morëm vesh në momentin që dolëm në pension. Besoj se edhe gardianët që kanë qenë në atë kohë në punë dhe s’kanë dalë në pension s’iu është paguar” poho Pjetri.
Ndërkohë, Agustin Buna thotë se thotë se është larguar nga puna për arsye shëndetësore dhe e ka mësuar që s’iu është paguar kur po bënte letrat e kempit. “Tani, edhe nëse këta s’na i kanë mbajtur paratë, përgjegjësia është e punonjësve. Ne s’e dinim se çfarë na mbahej a jo, ata e dinin” thotë ai.
Fiksi telefonoi financieren aktuale, Greta Gjergji, por kur ajo mëson se e telefonon Fiksi, mbyll telefonin dhe s’pranon të japë shpjegime. Në një mesazh shkruan se s’kishte bateri dhe për këtë problem duhet t’i drejtoheshim Drejtorisë së Përgjithshme të Burgjeve.
Fiksi i kërkoi informacion kësaj drejtorie se, për fajin e punonjësve të atij burgu, këta po sorollaten për vite me radhe. Fiksi i pyeti Burgjet se ku qëndron gabimi, a është verifikuar nga DPB ky problem dhe si mund t’u jepet zgjidhje?
Në përgjigje, burgu pranon se ajo pagesë nuk është bërë dhe për arsye se këta janë ish-punonjës, nuk mund t’u paguajë ato kontribute pasi kanë dalë nga skema. Burgjet sugjerojnë që punonjësit t’i drejtohen gjykatës pasi është e vetmja zgjidhje.
Ish gardianët kanë me dhjetëra letra dhe korrespondenca me institucionet ndër vite, por asnjë s’iu ka zgjidhur, teksa tashmë duhet të presin edhe vite të tjera, që të marrin edhe shtesën e pensionit të statusit të ushtarakut.
Burgjet kanë pasur korrespondenca me Sigurimet Shoqërore dhe Tatimet se si mund të veprohet me këta persona. Ka pasur vetëm-letërkëmbime, me qëndrime të ndryshe të të tria institucioneve. Në një rast, sipas kësaj shkrese, burgjet pranojnë se ka pasur ankesa të shumta të ish-punonjësve dhe punonjësve aktuale, pasi kjo situatë ka ardhur jo për faj të tyre.
Pikërisht për rregullimin e një gabimi të tillë, shkruajnë burgjet, i jemi drejtuar dy herë Tatimeve dhe Sigurimeve Shoqërore. Asnjë prej tyre nuk ka ndërhyrë, teksa në fund, Drejtoria e Burgjeve shkruan se e vetmja mënyrë është që ish-punonjësit dhe punonjësit aktuale duhet t’i drejtohen gjykatës.
Pra, për gabimet e punonjësve shtetërore dhe zvarritjes së procedurave nga këto institucione, qindra gardianë duhet të bredhin me vite me radhë në gjykata, ku deri më sot askush s’i ka gjetur fajtorët./ Top Channel
