Kryeministri Edi Rama nga Asambleja e Përgjithshme e Dhomës së Tregtisë dhe Industrisë Shqiptaro-Turke pohoi se marrëdhënies me dy vendeve kanë qenë gjithmonë të forta. Teksa nuk i kurseu batutat, duke e nisur me përshëndetjen në turqisht, ‘jakshamllar’, -‘mirëmbrëma’, Rama pohoi se Shqipërinë dhe Turqinë i lidh ambicia për të ardhmen.
“Jakshamllar (Akşamlar). Nuk di më shumë fjalë, por besoj se marrëdhënia mes Shqipërisë dhe Turqisë është e tillë, që i thotë të gjitha fjalët. Ne jemi dy vende me histori që na lidh dhe me ambicie të madhe për të ardhmen që na bashkon. (‘Tamam’-Kur e përkthen në turqisht fjalën e tij përkthyesi) Falë kësaj dhome mund të japim më mirë bashkëpunim mes dy vendeve. Përpara se të them dy fjalë për këtë bashkëpunim dua të kujtoj se pas errësirës së izolimit komunist, Shqipëria ka pasur në krah Turqinë, me një kontribut të vazhdueshëm me ndihmë dhe asistencë teknike. Nga infrastruktura, tek shëndetësia”, tha Rama.
Mes të tjerash kryeministri foli edhe për aeroportin që do të ndërtohet në Vlorë, ndërsa tha se kjo do të jetë një mundësi për punësim. Po ashtu Rama theksoi se edhe biletat e avionëve do të jenë më të lira. “Aeroporti i Vlorës do të jetë një stimul për rritjen e punësimit dhe si fuqizimit të turizmit. Ndërsa linja e re ajrore do të jetë më në fund një mundësi e re për zhvillim. Do të kemi rritje të fluksit të pasagjerëve që do të udhëtojnë drejt Shqipërisë, që pas më shumë se çerekshekulli ankesash, do të ndihen të lehtësuar nga çmimet e biletave”, theksoi Rama.
