Nga Boldnews.al
Kryeprokurorja e Përkohshme Arta Marku ka emëruar në krye të Prokurorisë së Durrësit, Anita Jellën, e cila nuk pranoi të hetonte shefen e saj, të kallëzuar për “shpërdorim detyre”. Pasi i doli në krah Arta Markut, kjo e fundit, si shpërblim, transferoi edhe bashkëshortin e Anita Jellës, prokurorin Erjon Shqarri nga Vlora, në Prokurorinë e Përgjithshme
Në fillim të janarit 2018, ish-drejtuesi i Prokurorisë së Elbasanit, Dritan Gina, kallëzoi penalisht Arta Markun se ajo shpërdoroi detyrën, pasi e largoi nga detyra pa asnjë bazë ligjore. Ky kallëzim, fillimisht i depozituar në Prokurorinë për Krime të Rënda, i kaloi për kompetencë prokurorisë së Durrësit.
Kallëzimi u shqyrtua nga prokurore Anita Jella, një mikeshë kursi në Shkollën e Magjistraturës me Kryeprokuroren e Përkohshme, Arta Marku. Vetëm 10 ditë pasi mori kallëzimin në dorë, Anita Jella vendosi mos-fillimin e procedimit penal, pa kryer asnjë veprim hetimor.
Kallëzuesi Dritan Gina e ankimoi vendimin në Gjykatën e Durrësit, e cila gjithashtu la në fuqi vendimin e prokurores. Aktualisht kjo çështje pritet të shqyrtohet në Gjykatën e Apelit në Durrës.
Por, vendimi pro-Kryeprokurores së Përkohshme iu shpërblye më së miri Anita Jellës. Fillimisht, Arta Marku vendosi të transferojë bashkëshortin e Jellës, prokurorin Erjon Shqarri nga Prokuroria e Vlorës në Prokurorinë e Përgjithshme. Ai dhe disa prokurorë të tjerë po asistojnë Arta Markun në procesin e Vetingut për prokurorët.
Transferimi i Shqarrit, si shumë veprime të tjera të Kryeprokurores Arta Marku, është kryer në shkelje të ligjit. Ai ka rreth një vit që është emëruar prokuror, pasi për shumë vite ka qenë oficer i Policisë Gjyqësore. E, megjithatë, pavarësisht eksperiencës së pakët, ai sërish emërohet nga Arta Marku për të kontrolluar cilësinë e punës së kryer nga kolegët e tij prokurorë me shumë vite eksperiencë.
Por, siç duket, Arta Marku e ka vlerësuar shumë angazhimin e Anita Jellës për ta mbrojtur nga kallëzimi për shpërdorim detyre. Të mërkurën, Kryeprokurorja e Përkohshme e ka emëruar prokuroren Jella në detyrën e drejtueses së Prokurorisë së Durrësit, një prej më të rëndësishmeve në vend
