Allegri e ka përsëritur në të gjitha televizionet e mundshme: 76 pikë nuk mjaftojnë. Ka të drejtë, nuk ka dyshim: nëse Juventus do t’i humbiste të gjitha ndeshjet deri në fund, titulli i pestë radhazi do të ishte praktikisht i pamundur për t’u fituar.
Por, nëse lëmë mënjanë matematikën, ajo që duket më e pamundur është që bardhezinjtë ta humbin këtë kampionat: sepse ka një avantazh prej 6 pikësh me Napoli-n, kur kanë mbetur edhe 6 ndeshje nga fundi dhe sepse, pa harruar se bardhezinjtë kanë fituar 21 nga 22 ndeshjet e fundit (duke barazuar vetëm në fushën e Bologna-s), kalendari është kundër “axurrëve”.
Një javë për t’u stërvitur dhe më pas tri ndeshje në shtatë ditë me një takim që do të zhvillohet në mesjavë: në fund të këtij mini-cikli, që do të mbyllet me Fiorentina-Juventus dhe Roma-Napoli, Juvja mund të hapë shampanjën ose të bëjë prenotimin e lokalit ku do të zhvillojë festën për titullin. Fiorentina, që nuk fiton një ndeshje nga 21 shkurti, është më pak e frikshme se Roma, megjithatë përfaqëson pengesën e fundit të vërtetë në marshimin drejt titullit të bardhezinjve, që do të luajnë 4 ndeshje nga 6 në shtëpi, kundër Palermo, Lazio, Carpi dhe Sampdoria, ndërsa transferta tjetër, përveç asaj kundër ekipit vjollcë, do të jetë në Verona, që historikisht ka qenë vendimtare në luftën për titull në kampionatin italian, por jo për “Zonjën e Vjetër”.
Fitorja 3-0 e Napoli-t kundër Verona-s ka shërbyer për të kthyer qetësinë brenda ekipit më shumë se sa për të shtuar shpresat për titullin: të shtunën në mbrëmje Sarri do të sfidojë Inter-in në “San Siro” dhe do të jetë e para e të paktën dy sfidave të vështira në transfertë, sepse as Torino nuk duket më një pengesë e lehtë për t’u kaluar. Në “San Paolo” do të paraqiten Bologna, Atalanta dhe Frosinone, por utopia e “scudetto”-s do të mbetet në këmbë vetëm me një sukses në Milano dhe, në rast të një hapi fals nga Juventus, me një sukses në Romë. Në të vërtetë, më shumë se për të qëndruar në luftë për titull, sfida në “Olimpico” do të shërbejë për të blinduar vendin e dytë.
Për më tepër, trajneri Allegri, gjatë një interviste për “Sky”, duke ribërë llogaritë e kampionatit ka harruar Napoli-n dhe ka përmendur vetëm Roma-n: “Duhet bërë kujdes sepse nëse i fiton të gjitha ndeshjet…”. Nëse do t’i fitonte të gjitha, do të arrinte ne kuotën e 84 pikëve dhe ndoshta mund të kalojë Napoli-n, por nuk mund të imagjinohet që Juventus të mos arrijë të grumbullojë 9 pikë në 6 ndeshjet e mbetura. Titulli është në “xhep”, mbetet për t’u kuptuar vetëm se kur do të fillojë festa. /Telesport
