Presidenti francez Emmanuel Macron ka bërë thirrje për një zgjidhje politike të konfliktit Izrael-Hamas pas shpalljes së marrëveshjes së armëpushimit në Rripin e Gazës nga Katari.
Macron nënvizoi rëndësinë e garantimit të respektimit të armëpushimit, duke theksuar lehtësimin e madh për popullin e Gazës dhe shpresën për pengjet dhe familjet e tyre pas 15 muajsh të asaj që ai e përshkroi si “një sprovë të pajustifikueshme”.
Ministria e Jashtme franceze tha në një deklaratë se armëpushimi duhej të zbatohej dhe të ruhej, me synimin për të liruar të gjithë pengjet.
Ministria kërkoi gjithashtu veprim urgjent për të adresuar krizën humanitare në Gazë dhe fillimin e menjëhershëm të përpjekjeve për rindërtim.
Franca gjithashtu u bëri thirrje mbështetësve të Izraelit dhe Palestinës – të përdorin armëpushimin si një mundësi për të punuar drejt një zgjidhjeje me dy shtete – duke garantuar siguri si për izraelitët ashtu edhe për palestinezët.
Kjo, sipas Francës, është e vetmja mënyrë për të arritur një paqe të drejtë dhe të qëndrueshme.
