Ndërsa agresioni rus në Ukrainë po i afrohet 3-vjetorit, besimi i ukrainasve tek presidenti Volodymyr Zelensky ka rënë lehtshëm.
Sipas të dhënave të mbledhura nga Instituti Ndërkombëtar i Sociologjisë me bazë në Kiev dhjetorin që sapo kaloi, 52 për qind e ukrainasve vazhdojnë të kenë besim tek Zelensky dhe tek lidershipi i tij, 39 për qind nuk kanë dhe 9 për qind janë të pavendosur.
Anketa tregon se ndërsa niveli i besimit është përkeqësuar përgjatë vitit të kaluar, balanca në favor të liderit ka mbetur pozitive në + 13 për qind.
Studimi tregon gjithashtu dinamikën e viteve të kaluara. Kështu, në fund të 2023-shit, 77 për qind e ukrainasve kishin besim tek presidenti; por në shkurt të 2024-s besimi ra në 64 për qind dhe në maj të të njëjtit vit në 59 për qind, me kuotën e atyre që shprehnin pakënaqësi që u rrit nga 22 në 36 për qind për të njëjtën periudhë.
Por shifrat vazhduan të binin edhe në periudhën tetor-dhjetor, me rënien që i atribuohet më shumë pasigurisë së të intervistuarve lidhur me të ardhmen e Ukrainës sesa me mungesën e besimit tek Zelensky.
Sondazhi u krye përmes intervistave telefonike, me numrat e telefonit që u zgjodhën rastësisht nga të gjitha rajonet e Ukrainës, duke përfshirë në total 2 mijë persona.
