Justin Trudeau ka dhënë dorëheqjen nga posti i kryeministrit të Kanadasë. Ai e dha lajmin në një konferencë të jashtëzakonshme për mediat.
Në fjalën e tij, Trudeau deklaroi se si kryeministër, ka bërë gjithçka për të mirën e vendit. “Për sa kohë që kam pasur pushtet, jam përpjekur për të mirën e Kanadasë”, tha ai përpara gazetarëve.
Trudeau nisi konferencën, duke thënë se çdo mëngjes që është zgjuar si kryeministër, ai është frymëzuar nga bujaria e kanadezëve.
“Unë synoj të jap dorëheqjen si lider partie, si kryeministër, pasi partia të zgjedhë liderin e saj të ri. Parlamenti ka qenë i paralizuar për muaj të tërë pas asaj që ka qenë sesioni më i gjatë i një parlamenti të pakicës në historinë kanadeze. Këtë mëngjes e këshillova Guvernatorin e Përgjithshëm se na duhet një seancë e re parlamenti. Kërkesa u pranua dhe Parlamenti do të pezullojë punën deri më 24 mars”, shtoi ai.
Ai tha se që kur u bë kryeministër në vitin 2015, ka luftuar për Kanadanë dhe popullin e saj, për të forcuar dhe rritur klasën e mesme dhe thotë se ka parë solidaritetin e vendit për të mbështetur njëri-tjetrin gjatë pandemisë dhe ka punuar në mbrojtjen e tregtisë së lirë në kontinent.
Largimi i tij vjen mes erërave të forta politike pasi ministri i tij i financave dhe aleati më i ngushtë politik u larguan papritur muajin e kaluar.
Trudeau, i cili tha se do të qëndrojë si kryeministër derisa të zgjidhet një lider i ri i partisë, është përballur me thirrje në rritje nga brenda partisë së tij për të dhënë dorëheqjen; Sondazhet tregojnë se liberalët do të humbasin zgjedhjet e këtij viti ndaj opozitës konservatore.
Largimi i tij vjen gjithashtu pasi Kanadaja përballet me kërcënime tarifore nga presidenti i sapozgjedhur i SHBA-së, Donald Trump. Republikani dhe aleatët e tij e kanë tallur vazhdimisht Trudeau-n në javët e fundit, me Trump që tallte Kanadanë si “shteti i 51-të”.
