Kryeministri Edi Rama në show-n e tij të radhës në dëgjesat me qytetarët, ndali në Laç dhe përtej fjalëve të “përroit psiqik”, për mrekullitë që ka bërë qeveria, nisi edhe dëgjesat me një pjesë hallezhinjsh. Ndër ta ishte një i sëmurë që me një qese ilaçesh në duar nxorri një prej tyre dhe tha konkretisht: “Këte ilaç e merrja me rimbusim dhe paguaja 60 mijë lekë të vjetra, ndërsa para dy javësh farmacistja më tha se ka dalë nga skema e rimbursimit dhe më duhet që ta blej për 200 mijë lekë”-, gjithashtu u ankua se i kanë kërkuar mbi 200 mijë lekë për analiza të cilat kryhen në privat dhe nuk është në gjendje që të paguajë për kontrollet e, pasi është i papunë dhe pa asnjë përkrahje.
Pa mbyllur ende fjalën, Rama nisi vetë të flasë, por arroganca nuk përfundoi vetëm me shpjegimin se po kryhen disa rakordime në lidhje me listën e ilaçeve të rimburueshme dhe iu kthye qytetarit: “Mos vazhdo me po, po, po…, sepse po flas unë dhe t’i dëgjo”. Pikërisht këto reagime të kreut të qeverisë tingëlluan aq “bukur” për deputeten Elisa Spiropali, që qeshi me batutat e “Skënderbeut” të dytë…
Kjo ishte vetëm një ndodhi nga Laçi, e ndodhur sot, live kudo në çdo kanal televiziv dhe për më shumë edhe në televizionin e tij “ER TV”. Por kjo formë arrogance nuk është e vetme, pasi në çdo takim në dëgjesat publike, Rama bën rolin e kryeministrit, humoristit, “policit të mirë”, “policit të keq”, batutaxhiut apo njeriut të prerë që u jep zgjidhje gjerave. Gjithashtu nuk ngurron që të kërcënojë ndonjë drejtor me shprehjet mëse bajate të dalë kohe e boje bashkë, duke u kujtuar se nëse brenda 24 orëve nuk ua zgjidh problemin që kanë, atëherë do i shkarkojë nga detyra.
Por të zgjidhësh hallin duke takuar kryeministrin dhe të dëgjosh edhe batutat apo arrogancën e tij, është e vetmja mënyrë për të parë një problem të bartur prej vitesh që të zgjidhet, edhe pse e drejta anon nga qytetari. Kryeministri del i larë nga këto takimi, zgjidh një e dy probleme të folësve, të nesërmen hedh video se ka punësuar ndonjë person dhe në fund mendon për takimin e radhës. Është e njëjta shfaqje, të njëjtat premtime, vetëm ndryshon vendi ku mbahet takimi dhe emrat e qytetarëve që ankohen… Në mos Elisën, me vete do ketë ndonjë femër tjetër të pushtetshme si dekor për teatrin e radhës.
