Dorian Duli dhe Ibrahim Lici, të dy në kërkim, janë pjesë e dosjes “Metamorfoza”. Të dy, janë ‘ftuar’ nga Gjykata e Posaçme kundër Korrupsionit dhe Krimit të Organizuarnë procesin që po zhvillohet ndaj Behar Bajrit, Pëllumb Gjokës dhe të akuzuarve të tjerë. Por, sipas “OraNews“, këta dy persona nuk gjenden në zonën e banimit. Rrjedhimisht është e pamundur që të merren në pyetje nga togat e zeza.
Në kushtet që të dy nuk gjenden në vendin e banimit, është urdhëruar që njoftimi për të të bëhet me shpallje publike. Kjo procedurë ligjore bëhet për shkak se Duli dhe Lici kanë qenë në shënjestër të grupeve rivale në Shkodër, e për këtë do duhet që edhe të jenë në dijeni të këtij procesi gjyqësor.
Përveç Dulit dhe Licit, në seancë është ftuar edhe Leze Ndoj, nëna e Gjin Ndojt, ky i fundit i vrarë në Shkodër. Kërkesë për të dëshmuar i është dërguar edhe Genc Tafilit dhe ish-policit të Burgjeve, Kleant Musabelliu. Tashmë, në seancën e radhës do të lexohet nëse punonjësit e Policisë së Shtetit kanë bërë të mundur njoftimin e personave të lartpërmendur.
Hetimet e Metamorfozës kulmuan pas përcjelljes së letërporosisë nga autoritetet franceze, ku rezultoi se në dhjetra biseda, Bajri komunikonte me të zhdukurin me Ervis Martinaj për vrasjen e Gjon Boriçit. Kjo dosje është veçuar nga ana e SPAK, sa kohë që Martinaj prej afro dy vitesh rezulton një person i zhdukur. Në përgjime rezultonte gjithashtu se Martinaj garantonte se do të eliminonte Kleanth Musabelliun për interes të Pëllumb Gjokës. Bisedat dhe provat e mbledhura nga hetimi tregojnë se Astmer Bilali me bashkëpunëtorët e tjerë tentuan dhe siguruan kushte për të vrarë Dorjan Dulin, Ibrahim Licin dhe Genc Tafilin, atentate që dështuan.
