Ministri i Financave i Serbisë, Dushan Vujoviç ka dhënë dorëheqje më 7 maj, duke përmendur arsye personale.
Vujoviç i ka dorëzuar letrën e dorëheqjes kryeministres Ana Brnabiç. Aty ai ka detajuar arsyet e largimit të tij, ka raportuar e përditshmja serbe Blic dhe televizioni N1.
Televizioni N1 ka raportuar se kryeministrja serbe do të njoftojë më 8 maj Parlamentin serb për këtë dorëheqje.
“Katër vjet janë të mjaftueshme që një person ta dëshmojë veten në një pozitë publike”, ka shkruar në letrën e dorëheqjes së tij Vujoviç, ka raportuar N1.
Ndërkaq, një mision i Fondit Monetar Ndërkombëtar ka arritur në Beograd më 7 maj për të nisur bisedimet për një program të ri të mbështetjes për vendet e Ballkanit, për të shtyrë përpara reformat dhe për të nxitur rritjen ekonomike.
Ish-ekonomist i Bankës Botërore në Ukrainë dhe në selinë në Uashington, Vujoviç ishte emëruar në postin e ministrit të Financave më 2014 dhe ka qenë i përfshirë në bisedimet e Serbisë për një marrëveshje me FMN-në.
Ka kohë që flitet për mundësinë e riorganizimit të kabinetit të Brnabiç. Kryeministrja serbe ka thënë se “kushdo që nuk është në gjendje të japë të gjitha nga vetja”, do të shkarkohet nga kabineti i saj.
Presidenti serb, Aleksandar Vuçiç ka thënë se do të ketë ndryshime në kabinetin qeverisës, por se për momentin, prioritet është zgjidhja e “nyjes së Kosovës”, duke iu referuar kështu përpjekjeve të Serbisë për të përmirësuar raportet me Kosovën, si pjesë e përpjekjeve drejt anëtarësimit në Bashkimin Evropian. REL
