“Paralizohet” e-albania, qytetarët prej ditësh nuk marrin dot shërbimet
Në redaksinë tonë kanë mbërritur disa denoncime nga qytetarë të cilët po hasin probleme të vazhdueshme me sistemin e portalit E-Albania. Sipas një prej denoncuesve, qytetarët kanë hasur vështirësi në ngarkimin e raporteve për lejen e lindjes, me pretendimin se sistemi është i bllokuar që prej një muaji. Pavarësisht përpjekjeve të shumta, ata nuk kanë mundur të realizojnë procedurat e nevojshme, ndërkohë që autoritetet mjekësore dhe ekonomistët kanë konfirmuar se nuk mund të kryhen shërbime për shkak të mungesës së sistemit.
Një tjetër qytetare, studente infermierie, ka kërkuar ndihmë pasi nuk ka mundur të aksesojë portalin për të rregjistruar provimin e licencës, të cilin duhet ta japë brenda një afati të caktuar. Ky provim, i cili jepet një herë në vit, është i domosdoshëm për të fituar të drejtën për të punuar si infermiere. Po ashtu, një qytetar tjetër ka raportuar se është hera e katërt që provon të hyjë në sistem, por përballet me të njëjtin problem, pasi E-Albania vazhdon të mos funksionojë siç duhet.
Këto denoncime pasqyrojnë shqetësimet e qytetarëve lidhur me funksionimin e dobët të platformës dhe ndikimin që ka kjo situatë në shërbimet e nevojshme për ata që kërkojnë të realizojnë procedura për nevojat e tyre profesionale, qytetare apo akademike.
