“Më kanë vrarë babanë!”, detaje të reja nga atentati në Athinë
Një atentat mafioz, ku ka mbetur i vdekur një shqiptar dhe është plagosur një tjetër, ka ndodhur këtë të diel në Athinë.
Bëhet fjalë për 45-vjeçarin, Irakli Davella, pronar i një lokali në zonën Peristeri të Athinës, i cili u vra pak pas orës 13:00 (me orën greke), në sheshin Thrakomakedonon jashtë një lokali. Gjithashtu, mbeti i plagosur Edi Lulo, 46-vjeç, i cili rezulton se ka një biznes në Durrës.
Së fundmi, është zbuluar një detaj i ri lidhur me ngjarjen, ku djali i viktimës ka telefonuar shokun e tij dhe i ka thënë: “Më kanë vrarë babanë!”.
Ngjarja ka ndodhur në sy të fëmijëve, pasi pranë vendit të ngjarjes është edhe këndi i lojërave të lokalit.
Dy shqiptarët kanë zbritur nga makina e tyre dhe janë nisur drejt kafenesë, kur në një çast kanë vënë re një makinë që po vinte drejt tyre me shpejtësi. Ata kuptuan se diçka e çuditshme po ndodhte dhe filluan të vraponin, por nuk ia dolën pasi autorët qëlluan drejt tyre.
