Të mërkurën, në “Olimpico” të Romës do të jetë përplasja e pestë dhe e fundit mes Juventusit dhe Milanit për këtë edicion futbollistik. Dy skuadrat e njohura të Seria A do të sfidojnë njëra-tjetrën në finalen e Kupës së Italisë, për ta bërë të vetin këtë trofe.
Juventusi, praktikisht një “kanibal”, ka gllabëruar titullin e shtatë radhazi në kampionatin italian dhe tashmë do të ndërtoj një tjetër rekord, “pokerin” radhazi në Kupën e Italisë. Kjo arrihet duke triumfuar të mërkurën, kundër një rivali historik, por që gjendet në një proces rinovimi.
Në kahun tjetër, kuqezinjtë e trajnerit Gattuso mund të marrin trofeun e parë nën menaxhimin e presidencës kineze dhe të mbyllë shkuarjen në “Europa League”, duke e bërë më pak delikate sfidën me Atalanta. Por, që pas Superkupës së Italisë, në vitin 2016, ku kuqezinjtë fituan me penallti, Juventusi nuk do të kapej më i papërgatitur.
Pas eliminimit të pabesueshëm nga çerekfinalet e Championsit, Allegri dëshiron ta mbyllë me dy trofe kombëtarë edicionin futbollistik te bardhezinjtë. Këta të fundit do të luajnë dy ndeshje në pesë ditë në “Olimpico”. Të mërkurën finalen e Kupës së Italisë dhe më pas sfidën e Seria A, kundër verdhekuqve kryeqytetas.
Hera e fundit e Juventusit në “Olimpico” ka qenë magjike, vetëm dy muaj larg, me suksesin ndaj Lazios. Juve vjen në sfidën e së mërkurës pasi ka siguruar avantazhin prej +6 pikësh nga Napoli dhe praktikisht i duhet vetëm një pikë për të siguruar matematikisht titullin.
Nga ana e tij, Milani i ri i Gattusos, i cili është zgjuar paksa, në sajë të dy fitoreve të fundit, pas gjashtë ndeshjesh pa një fitore, do të përpiqet të befasojë. Natyrisht, kuqezinjtë do të bazohen tek eksperienca në mbrojtje e Bonuccit, te lëvizshmëria në mesfushë e Calhanoglu dhe Bonaventura, ndërsa në sulm, duke sfiduar Higuain, do të luajë “fëmija” Cutrone. Nga ai pritet shumë në finalizim, sepse ka pasur një sezon pozitiv prej 16 golash në 44 ndeshje të luajtura.
