Prindërit nxehen shpesh me fëmijët e tyre për shkak të kohës së gjatë që këta të fundit kalojnë me smartfonë në dorë. Ata ua marrin ose ua ndalojnë përdorimin e tyre për një farë kohe. Por nëna që shfaqet në videon e mëposhtme e ka çuar edhe më tej “hakmarrjen” ndaj pajisjeve teknologjike që mbanin në duar fëmijët e saj.
Ajo i ka vendosur mbi një trung dhe i ka qëlluar me çifte. Pamjet tregojnë sesi ajo bën copash një “iPhone” vetëm me një të shtënë. Ndërsa copat fluturojnë në ajër, ajo thotë: “Refuzoj që të mos u bindeni atyre që them unë. Po marr sërish rolin e prindit. Fëmijët e mi janë më të rëndësishëm se çdo gjë tjetër”, thotë ajo.
Në sfond shfaqen fytyrat e trishtuara të tre fëmijëve të saj adoleshentë, ndërsa njëri prej tyre mbledh copat e smartfonëve, për t’i vendosur sërish mbi trung.
Për mamanë e nxehur, “ekzekutimi i armikut” nuk ka përfunduar. Ajo merr një çekiç dhe i “bën pluhur” ato çka kanë mbetur nga pajisjet.
“Të kontaktoni me njerëz që nuk i njihni, të përfshiheni në drama pa pasur arsye dhe të futeni në telashe për shkak të këtyre telefonave? Nuk do të lejoj në asnjë mënyrë t’ju influencojnë në mënyrë kaq negative”, thotë ajo në video.
