Kancelari gjerman Olaf Scholz e përshkruan rënien e regjimit të Asadit në Siri si “lajm të mirë”, por thekson se gjëja e rëndësishme tani është rivendosja e ligjit dhe rendit në vend, ndërkohë që kërkon zgjidhje të bazuara në rezolutën 2254 të Kombeve të Bashkuara.
“Bashar al-Assad ka shtypur brutalisht popullin e tij, ka rënduar ndërgjegjen e tij me jetë të panumërta dhe ka shtyrë shumë njerëz të ikin nga Siria. Shumë prej tyre erdhën edhe në Gjermani. Populli sirian ka përjetuar vuajtje të tmerrshme. Prandaj, fundi i sundimit të Asadit në Siri është një lajm i mirë”, thekson kancelari në njoftimin e tij, ndërsa nënvizon se “ajo që është tani e rëndësishme është rivendosja e shpejtë e ligjit dhe rendit në Siri” dhe se “të gjitha komunitetet fetare dhe të gjitha pakicat duhet të gëzojnë mbrojtje tani ashtu edhe në të ardhmen”.
“Zgjidhja politike e konfliktit në Siri duhet të bëhet në përputhje me Rezolutën 2254 të Këshillit të Sigurimit të Kombeve të Bashkuara”, thuhet në deklaratën e kancelarit gjerman.
“Ne do t’i gjykojmë sundimtarët e ardhshëm nëse i lejojnë të gjithë sirianët të jetojnë me dinjitet dhe vetëvendosje, nëse mbrojnë sovranitetin e Sirisë nga ndërhyrja keqdashëse e palëve të treta dhe nëse jetojnë në paqe me fqinjët e tyre”, tha kancelari gjerman.
