Agjencia Hapësinore Amerikane Nasa sapo ka lëshuar në kozmos sondën “InSight” drejt planetit Mars. Kjo sondë do të jetë e para që do ta përqëndrojë vëmendjen tek brendësia e planetit të kuq.
Mjeti kozmik, i cili pritet të mbërrijë në nëntor në Mars, do të vendosë sizmometra mbi sipërfaqe për të diktuar tërmetet në planetin fqinj. “InSight” do të masë edhe ndryshimet e temperaturës nën sipërfaqe, të dhëna që shkencëtarët thonë se do të tregojnë përbërjen e brendshme të Marsit, duke hedhur më shumë dritë mbi formimin e planetëve, i cili ka ndodhur si proces 4,6 miliardë vjet më parë, rapoton BBC.
“Ndërsa valët sizmike udhëtojnë përmes Marsit ata marrin informacion gjatë rrugës, ndërsa udhëtojnë nëpër shkëmbinj të ndryshëm”, shpjegoi Dr Bruce Banerdt. “Dhe të gjithë ata që shohin në sizmogramë e kuptojnë se si ta nxjerrin atë informacion. Pasi të kemi marrë dridhjet nga drejtime të ndryshme në Mars, ne mund të bashkojmë një pamje tre dimensionalë brenda Marsi”.
Zbritja në sipërfaqen e planetit të kuq do të jetë mjaft sfiduese dhe si të gjitha misionet e zhvilluara përpara saj, sonda “InSight” do të kalojë 7 minutat e tmerrit.
Kjo është koha që i duhet mjetit kozmik për të hyrë në atmosferën e Marsit me 6 kilometra në sekondë, që të mundësohet më pas ndalimi i plotë në sipërfaqe.
Jo më kot quhen minutat e tmerrit, sepse kjo është faza në të cilën kanë dështuar më shumë së gjysma e misioneve në Mars.
Nasa dërgoi seismometra e fundit në Planetin e Kuq në vitet 1970, por këto misione nuk arritën të zbulonin vibrimet e terrenit, sepse instrumentet ishin pozicionuar në trupin e sondave.
Sa tërmete do të zbulohen gjatë një viti është e pasigurt, por vlerësimet sugjerojnë ndoshta disa. Lëkundjet kanë gjasa të jenë të vogla, ndoshta edhe më pak se një Magnitudë 3 ballë, të cilën shumë njerëz në Tokë nuk do ta ndjenin.
Sidoqoftë, edhe këto sinjale më të buta do të mbajnë informacion të mjaftueshëm në lidhje me nën-sipërfaqen për të lejuar shkencëtarët të ndërtojnë një model të thellësive dhe përbërjes së Marsit. (TemA TV)
