Me një aeroplan privat dhe i rrethuar nga miqtë, siç raportohet nga gazeta franceze “Le Parisiene”, Neymar ka zbritur në Paris. Braziliani la Sao Paolo të enjten dhe, të premten, u gjend në tokën franceze, pas uljes në aeroportin “Le Bourget”, pranë kryeqytetit francez.
Pas aterrimit, ylli i PSG-së u transferua në shtëpinë e tij në Bougival (Yvelines), ku do të vazhdojë rimëkëmbjen pas operacionit. Megjithatë, siç e ka konfirmuar Unai Emery, Neymar nuk do të bashkohet me dinamikën e trajnimit të ekipit dhe do të ndjekë planin e vet të riaftësohet.
Kthimi i tij në Francë vjen pas zemërimit të një pjese të tifozëve të ekipit parizien për shkak të vendimit të brazilianit, që ta përfundonte pjesën e parë të fazës riaftësuese në vendin e tij të lindjes.
Ndërsa është e vërtetë që raportet mjekësore deri më tani janë të favorshme, ne do të duhet të presim për testin e ardhshëm, i cili do të mbahet më 17 maj, për të parë nëse Neymar mund, ose nuk mund të marrë pjesë në Kupën e Botës në Rusi, edhe pse në Brazil janë optimistë.
