Lëvizja Socialiste për Integrim akuzoi sot mazhorancës se shkeli konsensusin me miratimin e ligjit për strehimin social një ditë më parë.
Kreu i grupit parlamentar të LSI-së, Petrit Vasili, akuzoi maxhorancën se është manipuluar raporti i komisionit përkatës për këtë projektligjin.
Për Vasilin, ligji i bë një pre e hajdutëve të qeverisë.
“Kjo demagogji dhe ky qëndrim urrejtës ndaj të varfërve, njerëzve në nevojë, të një qeverie e cila nuk është e majtë, është armikja më e madhe e të majtës. Mbron oligarkët, u jep qindra milionë euro koncesione, kullat janë në sy të qytetarëve dhe në fund bën sikur kjo do ti godasë oligarkët me 50 metra katrorë me një sipërfaqe 7 me 8.
Njëherazi seanca kishte vendosur që këto amendamente dhe debati i madh i opozitës të diskutohet në komisionin përkatës sipas kërkesës së firmosur nga kryetari i grupit parlamentar të PS-së, Taulant Balla dhe Fatmir Mediu.
Kjo e drejtë u dhunua dhe kryetari i parlamentit ligjëroi dje një parlament që ka ikur nga shinat e parlamentarizmit, është deformuar totalisht dhe rregulli qesharak për të respektuar sekondat e çmuara kur deputetët flasin është vetëm një turp dhe demagogji.
Ligji i strehimit social megjithëse opozita dha në konsensus në miratimin në parim për tu bërë një ligj i mirë dhe ndihmuar qytetarët e varfër, duke mos pasur asnjë paragjykim që ky ligj erdhi nga mazhoranca u rrënua dje ky konsensus.
Në funksion të grabitjes dhe vjedhjes, mazhoranca thyen çdo lloj konsensusi ndonëse bëjnë sikur duan konsensus. Ligji i bë një pre e hajdutëve të qeverisë”.
Ndryshimet e ligjit të ri
Sipas pr/ligjit për strehimin të drejtën për të përfituar nga programi i banesave sociale do ta kenë edhe të miturit nën 18 vjeç, në rastet kur këta të fundit janë liruar nga një vendim gjykate dhe kanë mbetur të pastrehë. Po ashtu pjesë e këtij programi do të bëhen edhe familjet apo individët që nuk kanë të ardhura apo i kanë ato të pamjaftueshme. Kategori që do të përfitojnë për shkak edhe të disa lehtësimeve që janë bërë në ligj.
Ndërkohë, në ligjin e ri janë bërë dhe ndryshime sa i takon përzgjedhjes së subjekteve dhe familjeve që do të përfitojnë banesa sociale. Sipas ligjit të ri, përzgjedhja do të bëhet nëpërmjet një sistemi pikëzimi, i cili do të miratohet dhe publikohet nga njësitë e vetëqeverisjes vendore. Kritere që do të bëhen publike përpara fillimit të procesit të aplikimit. Ndërkohë që ky sistem do të hartohet dhe do të bëhet publik për çdo vit, për çdo program social që njësitë vendore bëjnë publik.
Megjithatë vlen të theksohet se në programet e pikëzimit do të përfshihen vetëm individët të cilët përmbushin nivelin e të ardhurave të parashikuara sipas çdo programi. Ndërkaq, një pikë tjetër e ndryshuar në ligjin e strehimit social është dhe ajo sa i takon subvencionimit të qirasë.
Sipas ligjit të ri për të gjithë përfituesit e kategorisë së banesave me qira do të jetë Këshilli i Ministrave ai që do të përcaktojë shumën që këta të fundit do të paguajnë, duke mos lënë raste për abuzime.
Ndërsa sa i takon familjeve që do të përfitojnë banesa me kosto të ulët, ligji u ka lënë hapësira që këto të fundit të kenë të drejtë që të përfitojnë kredi hipotekare me kosto të ulët. Ndërkohë, në ligj është specifikuar që do të përfitojnë nga programi i banesave me kosto të ulët familjet me të ardhura mujore jo më të larta se të ardhurat mesatare të njësisë së vetëqeverisjes vendore përkatëse.
